VENEZUELA OO RABTA INAY XOOG KULA WAREEGTO DHULKA XADKA AH EE MURANKU KALA DHAXEEYO GUYANA.

Xiisadda u dhaxaysa dalalka dariska ah ee Venezuela iyo Guyana ayaa sare u kacday toddobaadyadii la soo dhaafay taas oo ka dhalatay muran dhuleed oo in muddo ah socday. Arrintu waa dhul dhan 160,000-square-km (62,000-square-mile) oo ku xeeran webiga Esequibo, oo u badan hawd, iyo dhul xeebeedka halkaas oo laga helay shidaal iyo gaas baaxad leh.

MAXAA KICIYAY XASAASADA?

Venezuela waxa ay dib u soo celisay sheegashadii dhulkeeda sanadihii ugu dambeeyay ka dib markii laga helay ilaa 11 bilyan oo foosto oo saliid iyo gaas ah oo laga soo saari karo xeebaha Guyana.

Venezuela ayaa ku guuleysatay taageeridda afti dhamaadkii todobaadkan laga qaaday Esequibo halka madaxwaynaha Venezuela uu rabo inuu sameeyo dowlad cusub sidoo kale waxa uu ballan qaaday shidaal iyo sahaminta macdanta aagga la sheegay.

Falanqeeyayaasha iyo ilo-wareedyo ku sugan Venezuela ayaa sheegay in aftida, oo  codbixiyayaashu ay sidoo kale ku diideen awoodda maxkamadda caalamiga ah ee caddaaladda (ICJ) ee kiiska, aysan u turjumi doonin duullaan dhab ah. Waxa ay yidhaahdeen, waa isku day Madaxwaynuhu uu ku doonayo inuu ku muujiyo awood iyo inuu taageero shacab u helo dowladdiisa ka hor doorashooyinka madaxtinimo ee 2024-ka.

MUXUU DHULKANI MUHIIM U YAHAY?

In kasta oo aagga xeebta ee Esequibo uu yahay kayn aan hore loo marin, haddana waxaa jiray in dhulkan sannadihii u dambeeyay laga helay saliidda qaydhiin iyo gaas, waliba aagga xeebaha ka baxsan, taasoo Guyana gelinaysa khariidadda adduunka ee soo saarayaasha saliidda.

Isbahaysi ay leeyihiin Exxon Mobil (XOM.N), Shiinaha CNOOC (0883.HK) iyo US Hess (HES.N) ayaa bilaabay soo saarista saliidda Guyana 2019. Wax soo saarka saliida ayaa hadda maraya ilaa 400,000 foosto (bpd) oo saliid iyo gaas ah waxaana la filayaa in uu kor u kaco in ka badan 1 milyan bpd sanadka 2027. Waxa ay si weyn u kordhisay dhaqaalaha Guyana waxa ayna u balan qaadaysaa dakhli aad u badan oo dalka soo gali doona sanadaha soo socda .

Madaxwaynaha Venezuela  ayaa Talaadadii sheegay in uu oggolaan doono in shidaal laga sahamiyo Esequibo, waxa kale oo uu sheegay in dhammaan shirkadihii horeba uga shaqayn jiray xeebaha Guyana ay haystaan ​​saddex bilood oo ay kaga baxaan.

MAXAY KU JAWAABTAY GUYANA?

Madaxweynaha Guyana Cirfaan Cali ayaa sheegay Talaadadii in wadanku uu u gudbin doono Qaramada Midoobay iyo ICJ hadalada madaxwaynaha Venezuela ee ku saabsan horumarinta saliida ee la soo jeediyay iyo in uu la hadlay xoghayaha guud ee Qaramada Midoobay Antonio Guterres.

Wasiirka arrimaha dibadda ee Venezuela ayaa Arbacadii sheegay in baraha bulshada uu kala hadlay dhiggiisa Guyana waxa uu ugu yeeray “waajibaadka aan racfaanka laga qaadan karin ee Venezuela”.